Carnaval qu’ei ua hèsta hòrt espandida en Euròpa tota e en America deu Sud.
Que comença aus Reis qui marcan la fin de las hèstas de Nadau e que s’estanga lo dimèrcs cierrós, debut deu periòde de Quaresma. Marcat per datas deu calendari crestian, lo sens d’aquera hèsta qu’ei tanben ligat au cicle de las sasons, carnaval que marca en Euròpa lo passatge de l’ivèrn a la prima, de l’esterilitat de las tèrras a la remesa en cultura.
L’etimologia de Carnaval (carnelevare) que significa de mei tirar la carn en referéncia a las privacions exigidas en periòde de Quaresma. Aqueras privacions que son atau compensadas per un periòde de suberconsum e de valorizacion deu minjar.
Las setmanas de la temporada de Carnaval qu’èran tanben, quauque còp, lo moment privilegiat de la dança e deus bals deu dimenge. Que dançavan generaument ad aquera sason au son de la votz.
Peu campèstre, en efèit, los joens qui organizavan los bals ne’s podèvan pas pagar los servicis de musicians. Qu’ei atau qu’en Vath d’Aussau, Carnaval qu’èra lo periòde privilegiat deu branlo cantat e deu rondèu en Gasconha centrau.
