| Aquitània que concentra ua bèra diversitat d’instruments de musica dits tradicionaus. En efèit, si los acordeons diatonics , los clarins o los vriolons e son plan coneguts peu gran public e presents en la màger part de las tradicions popularas o sapientas d’Euròpa e deu continent american los autes instruments deu patrimòni aquitan qu’estonan plan sovent.Hòrt espandits peus uns, que poderem estar temptats de’us denegar lo mendre interès. Exotics peus autes, la lor identitat misteriosa que chepica. Aquitània que coneish per exemple duas sòrtas de boha : la boha en Gasconha centrau e la chabreta en Peirigòrd. Dus noms per dus instruments de son e d’estetica diferents, imatges locaus de l’isclada de las bohas europèas. Las flabutas que’s desparteishen eras tanben en flabutas traversèras e flabutas dab bècs. Au demiei d’eras, los pifres hòrt espandits en Euròpa que coneishón ua destinada singulara en Basadés quan Bearn e’s destria per la preséncia deu parelh flabuta/tamborin , qui’s sembla a un « tòtem » instrumentau. |
