X
Lo 1èr dimèrcs d’agost que hè senhau d’obertura de las hèstas de Baiona.
Desempuish 1932, las hèstas d’estiu qui remplacèn la Sent Leon deu mes de març, debanan per la ciutat canterias, seguicis de carris, musicaires, dançaires… A la crotzada entre l’occitan e l’euskara, entre las culturas gascona e basca, aqueras hèstas qui duran cinc dias, que son de las màgers d’Euròpa.


La ceremonia d’obertura que’s debana au balcon de l’ostau de vila on personalitats balhan las claus de la vila aus festaires aplegats. La lenga occitana que pren part a la ceremonia, portada per personalitats ligadas dab l’actualitat.


Atau, en 2004 les fotbolaires de l’Aviron Baionés Cédric Pardeilhan e Laurent Cassouret que declamèn en occitan ua òda a Baiona, seguits en 2005 peu Jan de Nadau après lo son triomfe a l’Olympia, en 2006, per l’internacionau de basquet e miaire de jòc de l’Eslanç Bearnés Frédéric Fauthoux, chafrat « Lo Petiton », en 2007 peu capitani de l'Aviron Baionés Rugbi pro Richard Dourthe.

tà’n saber mei   fetes.bayonne.fr
L’obertura oficiau de las hèstas, plaça de l’ostau de vila qu’ei aviada per un concèrt de l’Armonia baionesa e de canterias polifonicas, d’òmis, gascons e bascos amassats. Lo repertòri gascon que s’engibana arron las cantas mei famosas :
" Aqueras montanhas " (Se canta) vertadèr imne occitan de la Mar Grana dinc a la Mediterranèa ;
" Los tilholèrs " deu cançonaire baionés de purmèra, Pèir de Lescà (1729-1807) ;
e " l’Immortèla " qui Jan de Nadau inaugurè dab las canterias en 2005.

« Salut Baiona » de Pèire Rectoran (1880-1952), imne de la vila en occitan (gascon maritime), entamenat per ua trompetada, que davanteja los dètz trucs qui marcan lo senhau tant esperat deu començar oficiau de las hèstas. Los coblets cantats en sòlo que son cada annada hidats a ua personalitat diferenta a qui la comission de las hèstas e vòu har aunor.

 
Darrèra actualizacion : ( 30-07-2008 )