Dacs, grana ciutat gascona famosa mercés aus sons tèrmas, qu’ei tanben hòrt coneguda  per las soas hèstas tradicionaus qui abrasan la vila pendent sheis dias peus torns deu 15 d’agost.

Lo dia que i regna ua hèsta mestrejada : aperitiu o disnar d’amics o dab la familha au son de las bandas e autas orquèstras en s’esgaiar per la vila un còp los passacarrèras vrespaus acabats.

Au començar de la serada, un còp passada la corrida, la cara de la vila que cambia. Que i a de mei en mei de monde.

Mei la serada avança, mei l'aire e vad caut : las cantas polifonicas deus estanguets que hèn rampèu aus passacarrèras musicaus de las bandas e autas formacions musicaus qui esgaian las carrèras deus lors aires enairejats e alègres.

Las animacions que son numerosas e per tots los atges : corsas de vacas, jòcs d'arenas, seguicis tradicionaus, pesca, pelòta basca, rugbi, quilhas de 9, concèrts...

Los instruments de musica tradicionaus : bohas, sonsainas, acordeons… qu’an ua plaça màger  en las Hèstas que sia au parat deus espectacles folclorics de chancaires o de danças gasconas, de bals tradicionaus o deu passacarrèra deu dimenge mieidia.